Марец
Будинок штреднєй школи „Лукиян Мушицкиˮ у Темерину вибудовани 1796. року и у барз є подлим стану. По словох директора Миломира Радича, Покраїнски завод за защиту памятнїкох култури дал согласносц за оправянє фасади и зробена потребна проєктна документация. Тиж, потребне и вибудовац ограду коло спортского терену у парку и асфалтовац терен. По обиходу школи, подсекретар Покраїнского секретарияту за образованє, предписаня, управу и национални меншини – национални заєднїци – Жолт Сакалаш, предложел руководству школи же би и надалєй провадзели конкурси спомнутого секретарияту, хтори у вязи з програмами и проєктами и же би школа требала контактовац и Канцеларию за управянє з явнима укладанями, пре обезпечованє средствох за обновйованє школскей фасади. Предложене же би школа поднєсла вимаганє за верификацию нового напряму ґимназиї за школярох хтори талантовани за рахункарство и информатику.
Обєкт ОШ „Петар Кочич” зоз Темерину крашнє ушорени, конки и школски двор пошорени. По словох директорки школи Александри Мишкович, пошвидко би требало обновиц закрице на централним обєкту, як и спортску галу. Подсекретар компетентного секретарияту Жолт Сакалаш надпомнул же важне же би представителє школи и надалєй провадзели обявйованє одвитуюцих конкурсох секретарияту. На питанє на яки способ заменїц школски авто, школи предложене же би контактовала орґан єдинки локалней самоуправи.
Гоч будинок ОШ „Серво Мигаль” зоз Мужлї стари, крашнє є ушорени и добре отримовани. Школа иснує уж 125 роки и наставу ше реализує у двох будинкох, цо очежує єй роботу (набавку опреми, виробок розпорядку годзинох за наставнїкох). Наставу ше отримує на сербским и мадярским язику. У розгварки зоз помоцнїцу покраїнского секретара Ливиу Корпонаи, директор школи Атила Молнар визначел же окремни проблем школи то маєтково-правни одношеня хтори за други будинок нє реґуловани, и же потребне анґажовац адвоката же би ше вони ришели. Тиж, школи очежана робота и пре структуру фамелийох з яких школяре походза, з оглядом же коло 25% школярох зоз фамелийох хтори жию зоз „материялного обезпеченя фамелиї“. На концу схадзки, констатоване же у прешлих 15 рокох до школи найвецей укладала праве АП Войводина.
Обєкт ОШ „Братство єдинство” зоз Билого Блата, гоч є стари, крашнє є ушорени, єднак як и школски двор. Владко Чорович, директор школи, наведол же ше у їх школи наставу реализує на трох наставних язикох, и же єст вельо школярох зоз винїмково худобней катеґориї жительства. Вельки проблем за школу представя и тото же школски будинок на жеми зоз под'жемнима водами, та проблем зопрец влагу у мурох. Тиж, проблем и же нє маю физкултурну салу. З тей нагоди, помоцнїца покраїнского секретара за образованє Ливиа Корпонаи надпомла же руководство школи може обезпечиц средства за технїчну документацию прейґ конкурсох. Тото цо позитивне же у школи нєт насилства, без огляду на язични и други розличносци. Тота школа ма реґистровану преширену дїялносц (етно-хижу и орґанизацию нащивох и екскурзийох).
Обєкт Польопривредней школи у Бачу барз вельки. У нїм ше находза штредня и основна школа. Їм найбаржей хиби информатична опрема. Тота штредня школа пестує добре сотруднїцтво зоз задруґами и приватнима фирмами по системи черанки услугох и доброх. По словох директора школи Драґана Новаковича, їх найвекши проблем то нєришене маєтковоправне одношенє, бо школа нє уписана до катастру, т.є. нє уписана є як власнїк будинку и жеми. Прето школа блокирана при приявйованю на вельке число конкурсох.
У Основней школи „Ян Колар” у Селенчи, заняти ше вельо пошвецую социялизациї ромских дзецох. Директорка школи Катарина Врабченяк указала на нєдостаток средствох за купованє инструментох за школски оркестер и средства за путованя на змаганя. Помоцнїца покраїнского секретара Милинка Хрчан предложела директорки же би задлужела особи хтори буду провадзиц конкурси и сотрудзовац з другима установами, з помоцу хторих би ше могло одбезпечиц додатни средства за функционованє оркестру.
Основна школа „Иво Лола Рибар” у Плавну то мала школа хтора ма лєм осем оддзелєня. Опрема, насампредз, мебель у учальньох, дослужени и нєбезпечни за хаснованє. Школа нє ма основни наставни средства, як цо то ленийка и циркель за табли, як и микроскопи. Директор школи Драґан Медич гварел же школа у поступку леґализациї, як и тото же їх найвекши проблем ришованє зогриваня. Помоцнїца покраїнского секретара за образованє Милинка Хрчан предложела же би колектив школи порядно провадзел конкурси, нє лєм того секретарияту, алє и других покраїнских секретариятох, як и конкурси других установох.
Обєкт ОШ „Серво Михаль” зоз Падею шорови и релативно добре опремени. Проблем представя тото же будинок обок при школи нє леґализовани. Окончователька длужносци директора Лїляна Милованов наглашела же би ше школи барз здали и тоти три учальнї хтори у тим будинку, алє же нє маю досц средства закончиц леґализацию. Други проблем представя стара и дослужена котловнїца хтора зогрива и школу и дзецинску заградку. Покраїнски секретар Михаль Нїлаш наглашел же ше муши цо скорей ришиц маєтни стан школи же би могли участвовац на конкурсох. Потолковал им и на яки способ треба пририхтац документацию за конкурс за доставанє средствох за адаптацию котловнїци.
Основна школа „Доже Дєрдь” у Ґунарошу ушорена и у добрим є стану. По словох директорки школи Гермини Чикош, найвекши проблеми то дослужена конструкция закрица школи, зогриванє, а тиж, потребна им и опрема за физкултурну салу. Школа конкуровала за средства за адаптацию. Предкладанє покраїнского секретара Нїлаша тото же би руководство школи провадзело и конкурси Покраїнского секретарияту за спорт и младеж (пре набавку опреми за физкултурну салу). Директорка спомла и проблем з учебнїками за дзеци зоз ИОП хторих нєт на мадярским язику. Покраїнски секретар им, тиж, предложел и же би послали прияви на конкурси за програми и проєкти за унапредзенє настави.
Будинок ОШ „Др Тихомир Остоїч” з Остоїчева ушорени, школски двор винїмно красни и у нїм єст 357 рижни файти древа. При концу роботи на адаптациї санитарного ґузла, за хтори школа прешлого року на конкурсу секретарияту достала средства. По словох директора Антония Цицмила, шлїдуюцого року буду конкуровац за оправку зогриваня и за обновйованє инсталацийох и закрица школского будинку. Того року конкурую за програми и проєкти, як и на конкурсу за службене хаснованє язика, бо маю заинтересовани дзеци за виучованє язика з елементами националней култури (за мадярски и польски язик, 25–30 дзеци по язику). Покраїнски секретар Нїлаш предложел же би школа послала допис секретарияту пре технїчну потримовку у вязи зоз тим.
Обєкт Хемийно-поживовей штреднєй школи у Чоки треба кус ушориц, як и ришиц проблем леґализациї физкултурней сали и добудованей часци у хторей ше находзи фризерски салон за праксу школярох. Йожеф Бата, директор школи, обвисцел делеґацию покраїнского секретарияту за образованє, хтору предводзел секретар Михаль Нїлаш, о плану упису за школски 2018/19. рок и о тим же ше отвори класу за напрям вилївач - розпущовач желєза и челїку (без дуалного образованя). Интересованє и далєй вельке за фризерски напрям. Кед у питаню кадрово ришеня, компетентни секретарият помогнє школи у їх ришованю.
ОШ „Йован Попович” у Чоки ма и видвоєне оддзелєнє у Санаду, а там закрице на обєкту у подлим стану. Зорица Буґарчич-Челекетич, директорка школи, тиж надпомла и тото же школска компютерска опрема дослужена и же прето нє можу хасновац апликацию е-дньовнїк. Покраїнски секретар предложел же би пре диґитализацию, як и пре спомнути потребни роботи на закрицу школского будинку, и далєй провадзели конкурси секретарияту.
ОШ „Жарко Зренянин” у Кикинди то добре орґанизована школа, престрана, солидно опремена, з убавеним школским кадром. По словох директора Тихомира Фаркаша, школа участвує на велїх змаганьох на хторих освоює и перши места. Биляна Кашерич, помоцнїца покраїнского секретара за образованє, похвалєла роботу колектива и їх сотруднїцтво зоз Центром за социялну роботу. У рамикох того сотруднїцтва коло двацецеро дзеци миґрантох орґанизовано ходза до школи раз у тижню, та ше теди и активносци прилагодзує ґу нїм. Кед слово о парняцким насилстве, у школи ше шицки складаю же, у вязи зоз тим, треба вецей робиц на превенциї.
Будинок школи ОШ „Вук Караджич” у Кикинди шорови и под защиту є держави. По словох директорки Оливери Лазич, нєобходне ренововац школски двор, бо є нє ушорйовани од 1950. року. Далєй, потребне заменїц або санировац закрице. Биляна Кашерич, помоцнїца покраїнского секретара за образованє, предложела же би школа провадзела конкурси нє лєм секретарияту за образованє, алє и конкурси других секретариятох пре доставанє нєобходних средствох за спомнути роботи.
ОШ „Йован Попович” у Кикинди винїмно добре орґанизована и активносци у школи на найвисшим уровню. Школа шорова, престрана и ма стимулуюцу роботну атмосферу. Директорка школи Єлена Крвопич гварела же участвую у велїх пилот-проєктох и же будую орґанску заграду у школи, у рамикох проєкта поднїмательни школи. Вона наглашела же потребне закончиц роботи на школскей фасади. Тиж, гварела же су заинтересовани и за уводзенє билинґвалней настави. Помоцнїца покраїнского секретара за образованє Биляна Кашерич предложела руководству школи же би и далєй провадзели конкурси за доставанє средствох пре законченє роботох фасади. У вази зоз двоязичну наставу, совитоване им обрациц ше ґу Министерству просвити.
ОШ „Йован Стерия Попович” зоз Вершца по чишлє школярох дзевята школа по велькосци у Банату. Креативносц занятих очиглядна – школа охабя упечаток крашнє ушореней и успишней установи. По словох директорки Лїляни Бешлин, кед слово о нєобходних роботох, приоритет то ришованє проблемох з оградним муром двора школи пре общу безпечносц. Иншак, тота школа ше може похвалїц з талантованима школярами, цо потвердзую и резултати школярох на змаганьох з рижних обласцох. Биляна Кашерич, помоцнїца покраїнского секретара за образованє, предложела же би ше орґанизовал приход тих успишних школярох и їх наставнїкох до Скупштини АП Войводини.
По словох директорки ОШ „Олґа Петров Радишич” зоз Вершцу Йонел Буґа, єдней цалей часци будинку тей школи потребна санация – прето же вона стара вецей як двасто роки. Медзиповерхова конструкция ше звалєла, та тота часц и заварта, з оглядом же є нєбезпечна. Помоцнїца покраїнского секретара за образованє Биляна Кашерич предложела же би ше школа за помоц обрацела и ґу Управи за капитални укладаня. Кед у питаню набавка опреми за унапредзованє образовно-воспитней роботи, панї Кашерич спомла факт же школа препущела нагоду конкуровац за средства хтори прейґ конкурсу за тоту нагоду додзелює компетентни секретарият.
Покраїнски секретар за образованє, предписаня, управу и национални меншини – национални заєднїци Михаль Нїлаш зоз сотруднїками нащивел ОШ „Петефи Шандор” у Гайдукове. Мал нагоду опатриц закончуюци роботи на закрицу школского будинку, цо була єдна зоз найвекших и найважнєйших инвестицийох за тоту школу. Директорка школи Ана Сич подзековала секретарияту на финансийней потримовки, прето же тераз створени лєпши условия за роботу – и за школярох и за занятих. Шлїдуюца векша инвестиция треба же би була реконструкция закрица школского обєкту у Бачких Виноґрадох. По єй словох, школи потребна и рахункарска опрема, прето же постояца барз стара и нєупотреблїва. Секретар Нїлаш гварел же – после ребалансу буджету Покраїнскей влади – вироятно будзе розписани ище єден конкурс за опреманє просвитних установох у АП Войводини и же вшелїяк треба же би провадзели сайт секретарияту, пре благочасни информациї.
Ґимназию „Деже Костоланї” у Суботици нащивела делеґация секретарияту цо компетентни за образованє хтору предводзел покраїнски секретар Михаль Нїлаш. Будинок тей установи крашнє ушорени и ма приємни амбиєнт за наставу. По словох директора Атили Кароля Новака, тота ґимназия нє конкуренция общей ґимназиї Светозар Маркович у Суботици бо до тей штреднєй школи ходза талантовани школяре хтори ше опредзелєли за язичну ґимназию. Даєдни професоре робя у обидвох ґимназийох. Проблем представя тото же у тей ґимназиї дзеци зоз цалей Войводини и треба им обезпечиц змесценє у школярским доме чий капацитет огранїчени. Без огляду на тото же школа ма добре сотруднїцтво зоз школярским домом у Суботици, проблем змесценя дзецох уж роками присутни. Тиж, нєт професорох за одредзени предмети (нпр. Нємецки або шпански язик), бо школа нє ма можлївосци прияц наставнїкох на полни роботни час. Гоч школа релативно нова, сиґурносни камери дотирвани. Од опреми ище потребни рахункари. Треба заменїц лавки и карсцелї, хтори тиж дотирвани. Секретар Нїлаш и з тей нагоди гварел же школа муши провадзиц информациї о конкурсу хтори вироятно будзе розписани по ребалансу буджету и теди будзе средства за тоту наменку.
Обєкт ОШ „Томаш Ґ. Масарик” у Яношику (Алибунар) стари, алє очувани, чисти и барз крашнє ушорени, та є прето винїмково приємни за пребуванє. У школи ше реализує даскельо звонканаставни активносци. На самим початку схадзки, директорка школи Зузана Халабрин визначела проблем обстояня малих школох, односно школох зоз наставу на меншинских язикох, хтори маю мале чило школярох. Представителє секретарияту, з помоцнїцу покраїнского секретара за образованє Милинку Хрчан на чолє, визначели же ше секретарият барз стара о образованю на язикох националних меншинох и же – у складзе зоз своїма компетенциями – потримує таки школи и оддзелєня и намага ше же би вони обстали, без огляду на мале число школярох, а пре очуванє меншинских националних заєднїцох у АП Войводини, як и пре злєпшанє живота у малих штредкох. Гоч у учальньох патоси у барз подлим стану, пре нєясни власнїцки одношеня над будинком школи, школа ше нє могла приявиц на конкурс за инвестицийне отримованє, бо нє достала согласносц локалней самоуправи. Помоцнїца Хрчан предложела же би ше цо скорей ришело питанє власнїцтва, же би ше школа убудуце могла приявйовац на конкурси компетентного покраїнского секретарияту.
Будинок ОШ „Братство и єдинство” у Алибунару у подлим стану, мури барз стари и дотирвани. Окруженє будинку тиж досц нєушорене. Директорка школи Оливера Дадич наведла вецей проблеми з хторима ше школа зочує: барз подли стан будинку хтори вибудовани 1970. року, нєдостаток физкултурней сали, як и нєдостаток фахового кадру. Попри наведзених проблемох, директорка похвалєла школу пре успишне запровадзованє ИОП хтори запровадзели медзи першима и ище вше го успишно реализую. Помоцнїца покраїнского секретара за образованє Милинка Хрчан, после нащиви тей школи, утвердзела же є нєадекватно опремена и же хибя сучасни наставни средства. Суґеровала руководству школи же би були цо активнєйши у глєданю средствох за набавку опреми и же би – попри конкурсу компетентного покраїнского секретарияту – провадзели и конкурси других институцийох.
Обєкт ОШ „3. октобер” у Локвох (Алибунар) стари, алє є очувани и барз крашнє ушорени. По словох директора Йона Сфери, заняти у тей школи застарани за обстоянє школох на меншинских язикох, хтори маю мале число школярох. Тиж, наведли же уж велї роки маю проблем з учебнїками на румунским язику, як и же им хиби фахови кадер. Помоцнїца Милинка Хрчан у тей школи обецала же компетентни секретарият предлужи активносци на потримовки и очуваню школох з наставу на язикох меншинских националних заєднїцох. Проблем учебнїкох треба розпатриц з представителями Министерства просвити и Националним совитом Румунох, же би ше цо швидше пренашло ришенє за тот проблем.
OШ «Милица Стоядинович Сербкиня» у Врднику у подлим стану, алє з лєпшу орґанизацию тото мож злєпшац. Иншак, школа и физкултурна сала досц добре опремени. Директор Ґоран Жутич указал на потребу фахового усовершованя занятих, як и на вельки проблем нєплацених драгових трошкох. Тияна Павлов, помоцнїца покраїнского секретара за образованє, предписаня управу и национални меншини – национални заєднїци, предложела же би школа, у вязи з проблемом нєвиплацованя драгових трошкох, контактовала општину.
Делеґация покраїнского секретарияту за образованє, предписаня, управу и национални меншини – национални заєднїци, зоз помоцнїцу Тияну Павлов на чолє, нащивела ОШ «Доситей Обрадович» у Ириґу. Школа мала и у цеку реконструкция будинку. Колектив вредни, мотивовани, з полно идеями за роботу. По словох директорки школи Санї Николич, найвекши проблем же исти будинок хасную и школяре основней и школяре штреднєй фаховей школи. Вона указала и на проблем велького числа школярох по класох (насампредз у шестих класох) бо учальнї мали за таке число школярох. Досц школярох тей школи иду по ИОП. Иншак, школи потребни нови мебель и нова опрема за физкултурну салу.
ОШ «Милош Црнянски» у Жаблю з часци змесцена у старим, а з часци у новшим обєкту, хтори у добрим стану и хтори ше поряднє отримує. До тей школи ходза 860 школяре до 36 оддзелєньох. По словох директора Миодраґа Радишича, наставу ше отримує на сербским язику, а виучує ше ромски язик з елементами националней култури. У тей школи тиж єст школярох хтори ходза по ИОП-1, алє и по ИОП-2. Школа уключена до велїх проєктох, а школяре участвую на велїх змаганьох и маю награди з рижних дисциплинох. Сладяна Йоветич, помоцнїца покраїнского секретара за образованє, предложела школи же би и на далєй рядово провадзела конкурси секретарияту и же би апликовала за набавку нєобходних рахункарох, понеже школа уключена до проєкту E-дньовнїк.
ОШ «Братство» у Арадцу змесцена до обєкту хтори наменково будовани за потреби предшколского и основного образованя и уселєни є 1979. року. Обєкт красни, отримовани, алє – як цо Драґан Валери, директор школи, гварел – вельки проблем представя дотирвала столария хтору потребне цо скорей заменїц, же би ше енерґетска ефикасносц дзвигла на висши уровень и так зашпоровали значни средства яки ше троша на зогриванє. Попри тим, шлїдуюце важне питанє и набавка рахункарох до учальньох, кабинетох, алє и за потреби школскей управи. Сладяна Йоветич, помоцнїца покраїнского секретара за образованє, суґеровала руководству школи, же би и на шлїдуюцих конкурсох апликовали за средства же би могли реализовац проєкти за хтори школа заинтересована.
ШФШ «Борислав Михайлович Мигиз» у Ириґу одлично орґанизована. За чудовац ше цо шицко посцигую з таким огранїченим числом занятих. По словох директорки школи Исидори Биринї, тото єдина штредня школа у општини, а же би ше отримала – нєобходне вибудовац школярски дом. Тиж, потребне векше число занятих хтори би задоволєли потреби школи – у смислу рукованя з механїзацию и роботи на теренє, понеже лєм тота штредня фахова школа у АП Войводини ма напрям винїцар-винар. Тияна Павлов, помоцнїца покраїнского секретара за образованє, потримала спомнуте предкладанє и гварела же потребне инсистовац на вибудови школярского дома. Тиж, ше зложела и зоз тим же нєобходни нови будонок, же би ше подзелєли и оддвоєли од основней школи хтора хвильково змесцена до истого обєкту.
ОШ «Жарко Зренянин» у Ґосподїнцох змесцена до обєкту хтори вибудовани 1860. року. Коло старого будинку, 1990. року добудована нова часц хтора ище вше нє ма хасновательну дозволу и хтора нє леґализована. Поступок озаконьованя порушани и по конєц школского рока ше обчекує ришенє, же би школа могла апликовац на конкурсох за средства за ришованє нєобходних будовательних роботох на будинку. По словох директора школи Дарка Вранешевича, до тей основней школи ходзи 301 школяр, а у нєй ше виучує и руски язик з елементами националней култури. Попри информатичного кабинету, школи хиби и друга опрема и наставни средства. Помоцнїца покраїнского секретара Сладяна Йоветич, предложела же би спомнути проблеми могли з часци буц ришени зоз средствами з конкурсох яки розписує компетентни секретарият, алє и зоз средствами зоз других жридлох (наприклад донацийох). Кед после ребалансу покраїнского буджету будзе розписани конкурс, панї Йоветич дала школи упутства за конкурованє.
ОШ «Десанка Максимович» у Бачкей Паланки релативно нова и добре ушорена, алє иснує вельо нєришени маєтково-правни питаня хтори школа – у складзе зоз своїма можлївосцами и у сотруднїцтве зоз локалну самоуправу – ше намага ришиц. По словох директорки школи Мирослави Перак, пре хвилькову ситуацию, школа ше нє може приявйовац на велї явни конкурси за додзельованє средствох. Директорка информовала покраїнского секретара за образованє Михаля Нїлаша и о проблему нєдостатку информатичней опреми, прецо школа нє уключена до системи E-дньовнїк, як и о проблемох у вязи зоз застарену систему видео-надпатрунку. Покраїнски секретар предложел же би школа написала допис у вязи з потребами и послала го секретарияту же би розпатрел проблем и пренашол можлїви ришеня у рамикох будуцих конкурсох.
ОШ «Ружа Дюрдєвич Чарна» у Чортановцох дзелї будинок з предшколску установу и прето роби лєм у єдней змени. По словох директорки Станислави Йованович, попри прикапчовача на городски водовод, за школу найвекши проблем реконструкция фасади. Тияна Павлов, помоцнїца покраїнского секретара за образованє, им препомла на можлївосц приявйованя на конкурси и проєкти. Попри секретарияту хтори компетентни за образованє, пре можлївосц конкурованя за средства за проєктну документацию, тиж можу контактовац и Управу за капитални укладаня.
ОШ «23. октобер» у Сримских Карловцох ше находзи у проєкту отворених школох, з красну лєтню учальню, дзе ше отримує амбиєнталну наставу. Занїмаю ше зоз правеньом еко-загради, а шицки проєкти отримуюци и робя их у сотруднїцтве зоз Еколоґийним союзом. Школа участвує у проєкту E-дньовнїк и прето кладу акцент на нєобходносц набавки компютерох. Помоцнїца покраїнского секретара за образованє Тияна Павлов суґеровала руководству школи можлївосц приявйованя на конкурси и проєкти секретарияту.
Делеґация Покраїнского секретарияту за образованє, предписаня, управу и национални меншини – национални заєднїци, на чолє зоз помоцнїцу Тияну Павлов, нащивела сербску ґимназию – Карловецку ґимназию у Сримских Карловцох. То школа зоз красну атмосферу и функционалнима идеями хтори у интересу школярох и цалей заєднїци. Радован Ковачевич, директор ґимназиї, гварел же є барз задовольни зоз сотруднїцтвом зоз локалну самоуправу, як и зоз секретариятом хтори компетентни за образованє и же є у прегваркох зоз Министерством просвити пре помоц коло вибудови дома за школярох. Суґеровал можлївосц отвераня нових оддзелєньох (наприклад норвежски язик), як и преширенє сотруднїцтва прейґ рижних проєктох професорох (наприклад китайски, японски язик), з якима су повязани з розличнима институтами и културнима центрами. У вязи з нєдостатком физкултурней сали, директорови суґерована опция же би – у сотруднїцтве зоз локалну самоуправу – могол контактовац Управу за капитални укладаня. Кед секретарият за образованє у питаню, школи суґеровани можлївосци приявйованя на конкурси и проєкти.
Будинок Економско-тарґовинскей школи у Бечею крашнє ушорени, гоч є стари и муши ше го нєпреривно отримовац. Директорка Ґордана Ковачев визначела же секретарият за образованє вше давал вельку потримовку школи (финансийна потримовка за инсталациї, инфрастрктурни роботи, ИКТ опрему, а хвильково ше реконструує школски двор). У тей школи иснує вельо тими, планує ше и роби на велїх проєктох у сотруднїцтве з фондациями зоз Републики Мадярскей и Песталоци фондацию. Школи хиби физкултурна сала. Ливия Корпонаи, помоцнїца покраїнского секретара за образованє, суґеровала руководству школи можлївосци приявйованя на конкурси секретарияту и потримала их у намаганьох же би ше и школа максимално анґажовала у обезпечованю средствох за творенє оптималних условийох за реализацию образовно-воспитней роботи.
Обєкт ОШ «Шаму Михаль» у Бачким Петровим Селу ушорени и обачлїве намаганє занятих же би пребуванє у школи було приємне. Директор Ференц Беретка визначел же слово о малей школи и подзековал на финансийней потримовки секретарияту. У цеку будовательни роботи на старим будинку. Структура школярох барз зложена, прето же, коло 80% школярох припаднїки мадярскей националней заєднїци, а 20% – припаднїки сербскей националней заєднїци. Зоз вкупного числа школярох, коло 25% источашнє и припаднїки ромскей националней заєднїци. У школи велька флуктуация школярох и прето ше чежко знаходза у класи, а вельки проблем и їх оценьованє. Прето же школа ма проблем у вязи зоз маєтково-правнима одношенями, помоцнїца покраїнского секретара за образованє Ливиа Корпонаи предложела руководству школи шлїдуюци крочаї же би ше ришели спомнути проблеми.