Фебруар
Обєкт ОШ „Мирослав Антич“ зоз Футоґу у добрим стану. По словох директорки школи Ґордани Гайдукович-Яндрич, школяре ше добродзечнє приявюю на проєкт нашого Секретарияту „Енерґия вшадзи коло нас“. Достали аж и награду на Медзинародним конкурсу у Финскей. За унапредзенє того проєкту вимагани средства на конкурсу Секретарияту за образованє, предписаня, управу и национални меншини – национални заєднїци. Планую унапредзиц и проєкт „Мини капустияда“, у рамикох хторого дзеци зоз оводох, школох и Дома у Ветернику вєдно зоз локалну заєднїцу орґанизую роботнї, вистави и приредби.
Гоч будинок „Святи Сава“ у Руменки стари, у добрим є стану. У школи нєпреривно обновюю число рахункарох у информатичним кабинету, насампредз прейґ конкурсох. Наставу ше отримує и на сербским и на мадярским язику. Директор школи Жолт Дїлвеси виявел же континуовано пробує мотивовац родичох же би уписовали дзеци до мадярского оддзелєня. У будучносци ше планує прешириц школу, достац нову кухню и єдальню, виокремиц роботню и на таки способ достац додатни 12 учальнї.
Директор ОШ „Велько Петрович“ зоз Беґечу, Милан Татич, винєсол проблем меншого числа фахових сотруднїкох, насампредз прето же ше до школи уписую дзеци ромскей популациї хторим потребна дополнююца робота. Тим дзецом у сотруднїцтве зоз Городом обезпечене превоженє зоз населєня Банґладеш. Школи потребна добудов учальнї за пририхтуюцу, додатну и дополнююцу наставу, та су унапрямени же би ше приявели на актуални конкурси Секретарияту.
Обєкт штреднєй школи „Боґдан Шупут“ гоч стари, у одличним є стану. Будинок ошвицени и приємни. Нєобходна санация бетонских дражкох у школским дворе. Секретарка школи, Александра Вуясинович, визначела же по тераз нє мали проблеми зоз наставним кадром на обидвох язикох, на сербским и на мадярским. Тиж визначене же по тераз мали одличне сотруднїцтво з Националним совитом.
Найвекши проблем ОШ „Иво Андрич“ у Будисави то менше число школярох пре зменшане число дзецох, алє и пре перманентне висельованє фамелийох до жемох ЕУ. Директор школи Ґоран Срдич, гварел же жадаю отримац наставу на мадярским язику и же попробую прицагнуц и нових потенциялних школярох до школи. Вони школяром од першей по штварту класу понукаю орґанизоване предлужене пребуванє хторе ше финансує зоз помоцу мадярского националного совиту. Школи предложене же би з нїма у сотруднїцтве порушала векшу акцию спатраня стану потенциялних школярох до першей класи, хтори би могли слухац наставу на мадярским язику.
На роботней схадзки зоз представителями музичней школи „Исидор Баїч“ у Новим Садзе у главним бешедоване о вибудови новей школи, до хторей будзе змесцена нє лєм основна и штредня музична, алє и основна и штредня балетска школа. У новей школи ше планує формовац нови напрями, як цо то: поп музика, джез и модерна музика.
Штредня економска школа „Светозар Милетич“ у Новим Садзе уж применює дуалне образованє за образовни профил тарґовец. На обєкту потребна адаптация, та су унапрямени на актуални конкурси Секреатрияту за образованє, предписаня, управу и национални меншини – национални заєднїци.
Обєкт школи за основне образованє и воспитанє одроснутих „Святи Сава“ у Новим Садзе шорови, без огляду же го потребне реновировац. Предкладанє директора Николи Йоковича же би ше формовал образовни профил хтори будзе тирвац єден рок або курс за одредзену професию, за нащивительох хтори по законченю школованя жадаю предлужиц школованє.
Балетска школа у Новим Садзе шорова. Зоблєкальнї ше отримую. Директорка школи Саня Вучуревич представела випатрунок будуцей школи и идею за заєднїцку роботу зоз музичну школу. На основи тих податкох, а з оглядом же ше законченє вибудови школи обчекує концом 2019. року, сотруднїца у нашим Секретарияту, Марияна Дивиячки, директорку школи упознала з наступнима конкурсами и можлївосцами конкурованя.
У ОШ „Йован Дучич“ у Петроварадину, пре нєдостаток простору, настава орґанизована и у медзизмени за школярох першей и другей класи. Як гваря, достаточни би були ище три учальнї же би ше обкеровало наставу у медзизмени. У плану виробок проєкту за надбудов кабинетох за физику, хемию, биолоґию и ґеоґрафию. Унапрямени су на актуални конкурси у Секретарияту.
Директорка ОШ „22. авґуст“ зоз Буковцу, Миланка Деман, визначела же у школи панує добра и роботна атмосфера, же колектив зложни и же установа сучасна. Вельки акцент ше кладзе на еколоґию, защиту животного штредку и здраве костиранє. У школским дворе маю орґанску заградку. Каждого року отримую Фестивал здравей поживи „Желєнїяда“ до хторей уключени и родичи и школяре.
Обєкт ґимназиї „Йован Йованович Змай“ у Новим Садзе у добрим стану. Директор ґимназиї, др Радивоє П. Стойкович, надпомина же им Министерство просвити одобрело напрям медзинародней матури, хтори почнє з реализацию од септембра 2018. року. Наставу ше будзе отримовац лєм на анґлийским язику, окрем обовязного предмету сербски язик. У планє и черанка школярох, и у тим случаю би школяре зоз иножемства, на єден рок, приходзели до нас.
Обєкт ОШ „Десанки Максимович” у Футоґу у добрим стану, гоч потребне обилїц його нукашньосц. По словох директора школи Слободана Еґелї, у колективу панує добра и роботна атмосфера. Сала за физкултуру им нє за хаснованє. З оглядом же проєкт за єй реконструкцию маю уж вецей роки зоз дозволами за хаснованє, суґероване им же би ше явели на актуални конкурси секретарияту.
Перши упечаток о ШОШО „Милан Петрович” зоз Нового Саду то же обєкт сучасно вибудовани и ушорени и же є присподобени потребом шицких хасновательох. Пре вельке число школярох и одлични условия яки маю у тей школи и доме, нєобходне єй додатне преширенє. Тота установа ма нє лєм образовни, алє и социялни и регабилитацийни характер. Заняти у нєй жадаю же би школа постала ресурсни центер за асистивну технолоґию, же би ше оможлївело векшому числу хасновательох приступ ґу дзепоєдним помоцним средством.
Школа „Петефи Шандор” у Новим Садзе єдна зоз найвекших основних школох у городзе и припозната є, та родичи барз заинтересовани до нєй уписац дзеци. Попри того, предносц тей школи и у тим же ше у нєй реализує билинґвалну наставу, як и наставу на сербским и на мадярским язику. Проблем з яким ше школа зочує то поверхносц двора, бо до нєй ходзи вельке число школярох. Вони маю можлївосц же би – у форми факултативних активносцох – виучовали французки, китайски и гречески язик.
Обєкт ОШ „Михайло Пупин” зоз Ветернику крашнє ушорени и отримує ше го же би бул барз шорови, цо указує на намаганє занятих же би ше будинок отримовал и осучашньовал же би ше обезпечело оптимални условия за роботу. То єдина школа у околїску хтора нє ма предлужене пребуванє за школярох першей и другей класи, а родичи за тото барз заинтересовани. Директорка школи Теодора Митич визначела винїмково добре сотруднїцтво з родичами, месну заєднїцу и медиями, бо дзекуюци тому успишно ришую проблеми у школи.
Новосадска ґимназия „Светозар Маркович” у одличним стану, шветла є и барз приємна за пребуванє. Обєкт крашнє ушорени з численима змистами хтори наменєни школяром. Директорка школи Тат'яна Вукадинович визначела же школа поряднє участвує на конкурсох секретарияту. На обєкту нєобходне заменїц фасаду и облаки, цо барз драге, з оглядом же вон под защиту Покраїнского заводу за защиту памятнїкох култури. То єдина ґимназия у Новим Садзе у хторей ше настава одвива на сербским и мадярским язику. На схадзки ище визначели же маю проблеми зоз учебнїками на мадярским язику и же маю добре сотруднїцтво з националним совитом.
Обєкт ОШ „Мария Трандафил” зоз Ветернику ушорени з велїма деталями хтори нє надрилююци. У нїм виставени и велї дзецински роботи хтори провадза їх активносци. Чувствує ше приємна и опущена, алє роботна атмосфера. Школа од 2014. року участвує у медзинародней програми „Еко-школи” и перша є основна школа на териториї АП Войводини хтора достала Желєну заставу програми. Заняти у нєй ше намагаю постац модел школи у обласци еколоґиї и тирвацо отримуюцого розвою. Попри того, вони и домашнї Медзиреґионалней смотри бабкарских ґрупох хтора облапя и инклузивни дзеци.
Основна школа „Вук Караджич” зоз Нового Саду ше пресцера на велькей парцели и ма вельку и красну физкултурну салу. По словох директорки школи Зорици Зелькович, потребни им наставни кадер у обласци роботи зоз школярами з окремнима потребами, як и зоз школярами ромскей националносци. Вона указала и на потреби за рижнима укладанями як цо то вибудов нових просторийох, же би ше прицагло цо вецей школярох. Маюци у оглядзе тото же школяре жадни уметнїцкого доказованя, представнїком школи на роботней схадзки предложене же би ше школяре приявели на шветочносци хтори ше будзе отримовац у голу Покраїнскей влади. У школи поставени видео надпатрунок.
У Технїчней школи „Павле Савич” зоз Нового Саду було слова о напрямох хтори школа понука, як и о фаховим кадру. Директорка школи Мила Костич визначела же им ше хвилькове образованє зводзи на три подруча роботи. Велька заинтересованосц за шлїдуюци напрями: пекаре, месаре и фризере. Вельо ше роби на прицагованю нових школярох, а програми ше прилагодзує потребом тарґовища. З тей нагоди, директорка визначела же нєобходне же би ше закончело физкултурну салу хтора уж роками препада пре нєможлївосц єй хаснованя и адаптациї. Прето им суґеровани актуални конкурси секретарияту.
Новосадска ґимназия „Лаза Костич” окружена зоз ушореним и отримованим парком, цо доприноши опущеншей атмосфери за пребуванє школярох. Школи хиби физкултурна сала, чия вибудов планована у блїзкей будучносци. Средства за виробок проєкту обчекую од локалней самоуправи и покраїни. За тераз ше знаходза так же беру под закуп простор, алє то нє длугорочне и нє добре ришенє за школярох. То єдина школа з вибудовану театралну сцену на хторей мож виводзиц шицки театрални представи.
Основна школа „Душан Радович” з Нового Саду ше состої з трох окремних обєктох, од хторих єден нововибудовани и у подполносци одвитує вимаганьом модерней школскей образовней системи, док други два обєкти стари и вимагаю константне укладанє. Прето, занятим у школи суґероване же би ше приявели на конкурси нашого секретарияту. По словох директорки школи Славолюпки Михайлович, до тей школи ходза вецей як 450 школяре ромскей националносци, а попри того иснує огромна бездна медзи школярами истих рокох.
Обєкт ОШ „Йован Поповичˮ у Новим Садзе у добрим стану. По словох о.д. директора школи – Катарини Ковачевич – тота мала школа нє ма физкултурну салу, а кабинет за информатику им нєдостаточно опремени. Иншак, спомнута школа того року будзе домашня Медзинародному змаганю з русийского язика, з помоцу и у сотруднїцтве зоз НИС-ом. Як установа, видвоюю ше по виучованю русийского язика. Каждого школского року иснує можлївосц же би дзеци у шестей класи мали двоязичну наставу – на сербским язику и на русийским и анґлийским язику.
Новосадска ОШ „Коста Трифковичˮ поряднє конкурує на шицких конкурсох локалней самоуправи и покраїнских секретариятох. Приоритет им реконструкция школи, бо пре звекшанє числа дзецох муша шириц свойо капацитети. Директор школи Милан Спасоєвич ше заклада за тото же би кажда учальня була опремена з мудру таблу. Тиж, трима же би наставному кадру требало обезпечиц таблет рахункари. Школа ма приватне обезпеченє хторе финансую родичи.
Єден з приоритетох Технїчней школи Милева Марич Айнштайн з Нового Саду то вибудов школярского интернату. Проєкт за тоту наменку уж послати на розпатранє. Обєкт школи ґенерално у добрим стану, а потебне обновиц видео-надпатрунок и рахункарску опрему.
Штредня машинска школа у Новим Садзе ше пресцера на 10.000 м2 и находзи ше у солидним стану. Число уписаних дзецох ше з рока на рок значно звекшує. Школа вошла до узшого вибору Министерства просвити, науки и технолоґийного розвою за реализацию проєкту Е-дньовнїк.
Обєкт ОШ „Доситей Обрадовичˮ у Новим Садзе – гоч є адаптовани и надбудовани у 2011. и 2013. року – би требало ище прешириц. Иншак, школа добре опремена и шорова, та общи упечаток позитивни. Предлужене пребуванє барз добре орґанизоване. Школа уключена до велїх проєктох – на городским, покраїнским и републичним уровню, а сотруднїцтво з компетентним секретариятом задоволююце.
Основна школа „Светозар Маркович Тозаˮ у Новим Садзе добре опремена и шорова. Обєкт у добрим стану. Тоалети ушорени и ренововани. Школа ма ушорену шветочну салу, опремену кухню и предлужене пребуванє. Каждого року ше звекшує число уписаних дзецох. Директор и заняти у школи ше совисно и одвичательно одноша ґу своїм обовязком. Медзилюдски одношеня у колективу винїмково добри.
ОШ „Иво Лола Рибарˮ у Новим Садзе упозната з можлївосцами яки даваю конкурси секретарияту, бо им потребна финансийна потримовка за набавку опреми. Директор школи Саша Ґаїч представительох секретарияту информовал о закончуюцих роботох и репарацийох, як и о обезпечованю опреми за наставу (три мудри табли, швидки интернет, фасада, патоси). Предложене предлужованє сотруднїцтва.
Обєкт ОШ „Иван Ґундуличˮ у Новим Садзе шорови и приємни за пребуванє, цалком адекватни за цалодньове пребуванє дзецох у нїм. У школи ше пестує чувство припадносци часци городу у хторим ше школа находзи, та є украшена зоз сликами, фотоґрафиями и уметнїцкима инсталациями хтори инспировани з Алмашским крайом. Участвую у вецей проєктох, а єден з нїх то „Здрава пожива”, хтори школа реализує на Ченею. У питаню едукация о здравей поживи, дзе дзецом оможлївени директни контакт з природу и продукцию поживи, бо ше у школским пластенїку пестує овоц и желєняву.
З нагоди нащиви ґимназиї „Исидора Секуличˮ у Новим Садзе, директорка Ружица Вукобратович окреме визначела сотруднїцтво з Русию. Дзекуюци добрей орґанизациї школи и сотруднїцтву з амбасаду Нємецкей, школяре маю можлївосц каждого року покладац испит з нємецкого язика и з тим здобуц медзинародни сертификат. Ґимназия реґистрована и як ґалерия и у своїм депоу ма вецей як 300 уметнїцки дїла. За свою роботу и закладанє, школа 2015. року достала Святосавску награду.
Обєкт ОШ „Каролина Карасˮ у Горґошу ушорени. Обачує ше намаганє занятих же би ше стари школски будинок отримовал и бул приємни за пребуванє школярох. Школски двор пририхтани за заменьованє старих и осушених рошлїнох, саднїци уж обезпечени, лєм ше чека вигодну хвилю за садзенє. Тото цо барз позитивне то податок же совит родичох єдногласно вигласал же би родичи школярох тримешачно давали донацию школи у суми 100 динари, цо потвердзує же су свидоми значносци потримовки школи. То єден зоз способох же би ше указало же школа нє пасивна кед слово о находзеню донаторох.
У ОШ „Велько Влаховичˮ у Новим Садзе столария заменєна, так же енерґетска ефикасносц на завидним уровню. Тоалети чисти и шорови, як и цали обєкт у хторим панує барз приємна атмосфера. Роботна дисциплина, способ орґанизованя и руководзеня з установу на високим уровню, дзекуюци директорки школи – Любици Ґрубач. Медзилюдски одношеня у колективу винїмково добри. Физкултурну салу ше моментално реновує, а закончованє роботох ше обчекує за два-три мешаци.
ОШ „Дюра Якшичˮ у Катю роби у трох видвоєних обєктох. Єден обєкт подполно ренововани, централни обєкт у барз подлим стану, док треци обєкт – хтори за школярох першей и другей класи – ма проблем пре нєадекватни пешацки преход, дзе потребне обновиц означованє. У централним обєкту у цеку будовательни роботи. Директорка школи Верица Летич, зоз своїма сотруднїками, ше намага у школи обезпечиц найлєпши можлїви условия за пребуванє и роботу дзецох и занятих.
Обєкт ОШ „Лаза Костичˮ у Ковилю вибудовани ище 1971. року, а од теди нє було значнєйших укладаньох до ньго. Медзитим, дзекуюци закладаню директорки и занятих, обєкт ше отримує у пристойним стану и шицки проблеми ше ришує у складзе з можлївосцами, пре приємнєйше и безпечнєйше пребуванє дзецох и занятих у тей установи. Директорка школи Славица Ґрлич ше професийно одноши ґу своїм обовязком и задатком. Обєкт шорови и панує барз приємна атмосфера. Роботна дисциплина на високим уровню. Медзилюдски одношеня у колективу винїмково добри.
ОШ „Перша Войводянска Бриґадаˮ у Новим Садзе у одличним стану, ошвицена є, приємна и крашнє ушорена, з численима змистами за школярох. По словох директора школи Оливера Стояновича, школа пририхтала шейсц проєкти за хтори ше вимага средства. Тиж, школа планує конкуровац за средства на конкурсу за инвестициї, з проєктом за реконструкцию школскей кухнї. Директор визначел же ше планує и надбудов школи за хтору ше моментално чека будовательну дозволу.
Обєкт ОШ „Милош Црняскиˮ у Новим Садзе надбудовани 2009. року, кед школа достала ище єдну меншу физкултурну салу, библиотеку, два учальнї и шветочну салу хтору ше хаснує и як учальню. По словох директорки Зденки Ивкович, школа 2006. року вошла до програми „Школи без насилстваˮ. Тиж, директорка визначела и тото же є задовольна з опременосцу школи, як и же школа поряднє провадзи конкурси секретарияту.
Директор новосадскей ОШ „Бранко Радичевичˮ Александар Малетин похвалєл инициятиву секретарияту же би обиходзел воспитно-образовни установи. Вон визначел же ше потреби школи, у тей хвильки, одноша на инвестицийне отримованє. Як гвари, безпечносц у школи задоволююца, и попри того же у школи нєт физичного обезпеченя. ОШ „Бранко Радичевичˮ єдна зоз двох школох у Новим Садзе хтора ма цалодньову наставу и иснує вельке интересованє за нащиву настави у тей школи. Секретарка школи визначела и тото же їх учашнїки були у даскелїх програмох медзинародного сотруднїцтва.
Будинок ОШ „Майшанска драга ” у Суботици вельки и крашнє ушорени. У предходним периодзе, у централним будинку положени нови облаки, та школа вельо приємнєйша за пребуванє дзецох и занятих. Директорка школи Беата Боґнар подзековала Покраїнскому секретарияту за образованє на уручених средствох. З їх помоцу, школа осучаснєна и ришени даєдни нєдостатки хтори завадзали у рядовим наставним процесу. З тей нагоди, директорка надпомла и тото же маю пририхтани идейни проєкти за оправянє закрица на обєкту физкултурней сали, заменьованє облакох у обидвох будинкох, заменьованє ґазного котла, изолацию на пойдзе, реконструкцию спортского полиґону, оправянє огради и заменьованє нукашнїх дзверох.
Економска штредня школа „Боса Миличевич” у Суботици ше находзи у старим будинку и добре є очувана. Ентериєр зробени так же би здогадовал на готел, а школяре облєчени як заняти у готелу. На роботней схадзки було слова о запровадзованю дуалного образованя у школи, як и о факту же зоз тей школи вишли даєдни нови образовни профили, як цо то службенїк у банкарстве и финансийни администратор. По словох директора Имрета Зомбория, їх циль же би ше занїмали зоз кетеринґом и же би оспособели функционованє школярскей кантини. Кед слово о проблемох з якима ше зочує школа, наведол же то нєдостаток физкултурней сали и тото же будинок у власнїцтве єврейскей заєднїци, цо причина же нє можу участвовац на даєдних конкурсох.
Будинок ОШ „Боса Миличевич” у Новим Жеднику вельки и шорови. Ма вельо простору за реализацию звонканаставних активносцох у рамикох самого обєкту школи, як и у модерней физкултурней сали. З оглядом же школя ма мале число школярох, проблем представя вельки простор хтори нєдостаточно вихасновани. На обєкту потребне заменїц облаки же би ше зашпоровало на енерґентох и зменшало трошки школи, як и злєпшац сиґнал за интернет же би бул функционални у шицких учальньох.
Гоч є стари и дослужени, будинок Штреднєй технїчней школи у Ади наисце вельки и шорови. У рамикох школи ше находза обєкти дзе змесцени добре опремени роботнї. Делеґацию нашого секратрияту – з покраїнским секретаром за образованє на чолє – директорка Гилда Ґилице информовала о окончених роботох и репарацийох на школским будинку. З тей нагоди, бешедоване о планох за вибудов дому за школярох – за хтори школа уж ма пририхтани идейни проєкти – як и о тим же його вибудов наисце потребна, з оглядом же 70% школярох путує на наставу. Зоз вибудову и оспособйованьом спомнутого дома, витворела би ше и черанка школярох зоз Републику Мадярску (у рамикох прейґгранїчного сотруднїцтва). Тиж, директорка наглашела же школа винїмково добре сотрудзує з розличнима фирмами, орґанизує образованє одроснутих и понука одлични условия за своїх нащивительох. Як проблем з яким ше зочую, наведла нєдостаток фахового кадру зоз обласци машинства. На концу схадзки, покраїнски секретар за образованє Михаль Нїлаш визначел важносц наступних конкурсох и предлужованя сотруднїцтва, та понукнул помоц при ришованю чечуцих проблемох у школи.
Школа за основнe музичне образованє и воспитанє „Барток Бела” у Ади винїмково ушорена, алє досц мала. Прето, заплановане же би ше – по законченю будовательних роботох и адаптациї будинку ОШ „Чех Кароль”, тиж у Ади – преселєли до централного будинку. Анамариа Бач, директорка школи, попри иншим, як проблем наведла и нєдостаток фахового кадру. Вона понукла ришенє же би ше формовал едукативни центер на хторим би кадри окончовали преквалификацию. Покраїнски секретар за образованє Михаль Нїлаш виявел же секретарият потрима тоту идею, як и орґанизованє фахових семинарох у вязи зоз роботу шицких музичних школох у АП Войводини.
Прекрасни и вельки школски будинок ОШ „Чех Кароль” источасно и памятнїк култури у Ади. Директорка школи Ева Макшо упознала делеґацию Покраїнского секретарияту за образованє, на чолє зоз секретаром Нїлашом, з роботами на будинку и репарацию. З тей нагоди, догварене же би школа и далєй провадзела конкурси того секретарияту.
Будинок Основней школи „Новак Радонич” у Молу вельки и ма достаточно простору и за витворйованє звонканаставних активносцох. Средства достати од Покраїнского секретарияту потрошени за адаптацию будинку. Менаджмент школи проґресивни и намага ше ґу иновацийом пре усовершованє наставного процесу. Покраїнски секретар за образованє Михаль Нїлаш понукнул директорки школи, Снежани Дошич, потримовку секретарияту у поглядзе финансованя драгових трошкох за школярох хтори одходза на змаганя и за черанку школярох з братскима школами зоз Мадярскей.