Покраїнска влада обезпечела 161 милиони динари за превоженє штредньошколцох и унапредзенє вецейязичносци
Подпредсидатель Покраїнскей влади и покраїнски секретар Роберт Отот придал нєшка ришеня у суми од 161 милиони динари представнїком локалних самоуправох. Буджетни средства додзелєни по двох конкурсох, и то за реґресованє трошкох превоженя школярох штреднїх школох и за унапредзенє витворйованя права на язики и писма хтори ше службено хаснує на териториї АП Войводини.
Подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот придал нєшка ришеня представнїком локалних самоуправох у вкупней суми 161 милиони динари. Средства додзелєни по двох конкурсох яки Секретарият традиционално розписує, и то за реґресованє трошкох превоженя школярох штреднїх школох и за унапредзенє витворйованя права на язики и писма хтори ше службено хаснує на териториї АП Войводини. За превоженє штредньошколцох того року додзелєне 151 милиони динари.
«Тот конкурс ма окремну значносц бо директно уплївує на демоґрафску слику Войводини, зменшує обтерхованє фамелийного буджету, а насампредз оможлївює штредньошколцом ровноправни приступ образованю, без огляду на тото дзе вони жию. Ми бешедуєме о коло 20.000 школярох хтори кажди дзень путую до другого места пре нащивйованє настави. Ми маме обовязку дац им конкретну, системску потримовку», визначел подпредсидатель влади и покраїнски секретар Отот, додаваюци же у тим року потримани шицки 45 локални самоуправи у АП Войводини.
Други конкурс ше одноши на очуванє и унапредзенє права на язики и писма националних заєднїцох хтори ше службено хаснує. За тоту наменку додзелєне 10 милиони динари за 27 єдинки локалних самоуправох.
«Наша тирваца обовязка оможлївиц ровноправне хаснованє язикох шицких националних заєднїцох у службеней комуникациї. Зоз тим нє лєм же почитуєме уставни и законски одредби, алє и будуєме дружтво у хторим културна розличносц и вредносц и предносц. Дзекуюци конкурсу, општини и городи маю можлївосц финансовац поставянє двоязичних и вецейязичних таблох, друковац урядово формулари и публикациї, и розвивац електронску управу на язикох хтори ше службено хаснує» – наглашел Отот.
Од 2016. по 2025. рок, през тоти два конкурси опредзелєни значни буджетни средства, за реґресованє превоженя штредньошколцох, аж 1,52 милиярди динари, а за конкурс за витворйованє правох на язики и писма хтори ше службено хаснує видвоєне вецей як 82 милиони динари.
Зоз такима мирами, Покраїнска влада указує же водзи дошлїдну и одвичательну политику потримовки локалним самоуправом – як у унапредзеню условийох за доступне и ровноправне образованє за шицки дзеци, так и у очуваню и пестованю вецейязичносци и мултикултуралносци як важней часци идентитету Войводини.
Подпредсидатель Покраїнскей влади и покраїнски секретар Роберт Отот ришеня подзелєл вєдно зоз заменїцу покраїнского секретара Сладяну Бурсач.
