Сообщенє Секретарияту у вязи зоз способом реализациї образовно-воспитней роботи
Каждодньово провадзаци актуалну ситуацию у образовно-воспитних установох на териториї АП Войводини Покраїнски секретарият за образованє, предписаня, управу и национални меншини – национални заєднїци виражує свойо задовольство зоз фактом же векшина образовно- воспитних установох на териториї АП Войводини почала з реализoваньом воспитно-образовней роботи.
У актуалней ситуациї постої одредзене, менше число образовно-васпитних установох хтори ше зочую зоз физичну блокаду школских обєктох з боку меншого числа школярох и родичох. З такима поступками ше онєможлївує витворйованє права на образованє школяром и права на роботу наставнїком у наведзених школох.
Же би ше превозишло таки ситуациї Министерство предложело реализацию образовно-воспитней роботи за шицки класи на далєкосц. Покраїнски секретарият у цалосци потримує тоту инициятиву Министерства просвити, прето же трима же реализованє настави на далєкосц у ситуациї физичней блокади школских будинкох у найлєпшим интересу и школярох и занятих.
По препоруки Министерства кажда локална самоуправа треба же би преценєла актуални стан у образовно-воспитних установох на своєй териториї и у складзе зоз тоту прецену поднєсла вимаганє Министерству просвити за реализованє образовно-воспитней роботи на далєкосц.
Покраїнски секретарият трима же таки способ реализованя образовно-воспитней роботи у найлєпшим интересу и школярох и занятих и же установи буду мац нагоду вихасновац шицки капацитети и искуства наставнїкох у вязи зоз таким способом реализациї настави, зоз чим ше обезпечи условия за реґуларни конєц того школского року.