Уручени награди найуспишнєйшим штредньошколцом за видео роботи
Дзевец таблет рахункари уручени нєшка у Голу Покраїнскей влади найуспишнєйшим штредньошколцом хтори участвовали на конкурсу за вибор видео роботох на тему „Мултикултуралносц и етнїчна рижнородносц у Войводини”. Конкурс настал дзекуюци сотруднїцтву Асоцияциї Културанова и Покраїнского секретарияту за образованє, предписаня, управу и национални меншини – национални заєднїци.
„Єден з мотивох за одлуку секретарияту же би ше придружел идеї и же би ю дзечнє потримал вшелїяк у тематичним одредзеню конкурсу, алє важне було и тото же поволанка нашим штредньошколцом у себе мала творчу водзацу думку – требало ше опредзелїц за даєдну форму уметнїцкого виглєдованя, мац розвиту способносц мриї и буц креативни и одвитовац на теми з хторима ше ми дакеди декларативно, по уходзеней навики, хвалїме, активно и демонстративно.” виявел ‒ подпредсидатель Покраїнскей влади и ресорни секретар Жолт Сакалаш на шветочносци.
Видео роботи подрозумйовали кратку форму, до дзешец минути тирваня и занїмали ше з темами мултикултурализму и етнїчней рижнородносци на териториї АП Войводини.
Важни аспект конкурсу була можлївосц же би школяре робели самостойно, алє и здружено – у ґрупох и же би ше у своїх визуалних роботох служели з мацеринским язиком.
„Нашо штредньошколци дали творчи рефлекс и власне дожице тим вредносцом хтори у велїм одредзую сущносц Войводини и пре хтори вона препознатлїва и єдинствена на мапи Европи, як нєупоредзуюцо богати етнїчни, язични и културни простор з коло трицец автентичнима националнима заєднїцами у складним соживоце.” – додал Сакалаш.
Конкурс бул розписани у периодзе од 8.12.2020. до 28.12.2020. року, сцигли осем прияви, при чим авторе штирох видео роботох наградзени з таблет рахункарами хтори уручели подпредсидатель Покраїнскей влади Жолт Сакалаш и заменїк ресорного секретара Милан Ковачевич.
Список наградзених авторох и їх роботи можеце превжац ТУ.
Витайце до Старей Пазови | Бабово сказки |
Любов спрам розликох | Рижнородни у чудесним швеце |
