Двацец милиони динари за набавку видео-надпатрунку
Контракти за набавку видео-надпатрунку и опреми за повязованє з просторию за мониторинґ уручени нєшка у будинку Скупштини АПВ. У рамикох пилот-проєкту Покраїнскей влади, за тоти наменки обезпечени вкупно двацец милиони динари, и то тринац милиони – на уровню основного образованя и седем милиони – на уровню штреднього образованя и воспитаня. Заменїца покраїнского секретара Сладяна Бурсач уручела нєшка представительом школох вкупно тринац контракти.
„То перши пилот-проєкт такей файти на териториї АП Войводини, хторому циль умрежиц, то єст повязац образовно-воспитни установи з представителями єдинки локалней самоуправи, хтора и опреми мониторинґ просториї у полициї. Општина Стара Пазова и општина Темерин перши два хтори участвую у тим проєкту, док ше у наступним периодзе планує уключованє и других локалних самоуправох у Войводини. Конєчни циль того пилот-проєкту то же би, у складзе зоз Националну стратеґию за превенцию и защиту дзецох од насилства, кажде дзецко одрастало у безпечним и стимулуюцим окруженю, почитуюци права дзецка на защиту од шицких файтох насилства.” – виявела заменїца покраїнского секретара Сладяна Бурсач.
Же би ше промововало и унапредзело безпечносц школярох у установох основного и штреднього образованя и воспитаня на териториї АП Войводини, на конкурс ше приявели 42 установи, од хторих тринац виполнюю условия предписани з Правилнїком.
