Винчованка з нагоди швета румунскей националней меншини – националней заєднїци
З нагоди 1. децембра, швета румунскей националней меншини – националней заєднїци, дня на хтори преглашене зєдинєнє Румуниї, найсердечнєйше винчуєм шицким припаднїком румунскей заєднїци у Републики Сербиї и Автономней покраїни Войводини тото швето.
Скупштина Автономней покраїни Войводини 2018. року принєсла Покраїнску скупштинску одлуку о утвердзованю и шветочним означованю датумa од покраїнскей значносци, зоз хтору 1. децембер, дзень на хтори преглашене зєдинєнє Румуниї, утвердзени як датум од окремней значносци за румунску националну меншину – националну заєднїцу, а з тим и за Автономну покраїну Войводину, як потвердзенє пошвеценей политики мултиетнїчносци и мултикултуралносци яку запровадзую шицки покраїнски орґани.
Oзначованє швета националних заєднїцох здогадую на унапряменосц ґу заєднїцтву, утвердзує чувство припадносци, потвердзенє є почитованя меншинского идентитету и будує мултинационалну кохезию утвердзену на взаємним почитованю и порозуменю.
У Автономней покраїни Войводини, у злагоди и гармониї, жию и припаднїки румунскей националней заєднїци, дзекуюци и намаганю Покраїнскей влади же би обезпечела защиту и очуванє образованя, традициї, култури и язика националних меншинох у Покраїни. Тото указує на повязаносц и исти вредносци хтори дзелїме, цо нам ма буц драгоказ и за будучносц, пестуюци заєднїцки европски вредносци и принципи за добробут шицких наших гражданох.
Румунскa национална заєднїца доприноши ґу очуваню и унапредзеню тих вредносцох и принципох, а окреме гевти єй припаднїки хтори активно участвую у очуваню румунского идентитету у обласци образованя, култури, информованя и службеного хаснованя язика и писма, як цо – прешвечени сом – буду робиц и у будучносци.
У тото мено, винчуєм Дзень румунскей националней заєднїци!
Покраїнски секретар,
Роберт Отот