50 милиони динари за унапредзованє безбечносци у школох ширцом Войводини
Подпредсидатель Покраїнскей влади, покраїнски секретар Роберт Отот, уручел нєшка контракти по двох конкурсох Покраїнского секретарияту за образованє, предписаня, управу и национални меншини – национални заєднїци, унапрямени на унапредзованє безпечносци обєктох основних и штреднїх школох на териториї АП Войводини.
Слово о конкурсох за набавку опреми за унапредзованє безпечносци и за виводзенє роботох на обєктох школох пре звекшанє безпечносци. Вкупна вредносц обидвох конкурсох виноши 50 милиони динари, а потримана 41 школска установа – 28 основни и 13 штреднї школи.
Средства буду вихасновани за набавку процивогньових апаратох, детекторох металу, системох видео-надпатрунку, поставянє гидрантских мрежох, сиґурносних дзверох, оградох и других елементох хтори доприноша векшей защити и сиґурносци школярох и занятих.
«Шицки активносци яки нєшка запровадзуєме унапрямени на єден приоритет – безпечносц школярох и занятих. Безпечна школа нє лєм простор за ученє, алє и место у хторим ше дзеци чувствую защицени, потримани и одшмелєни напредовац. Прето наша обовязка твориц условия у хторих кажде дзецко може роснуц, розвивац ше и учиц у сиґирним окруженю.» – виявел Отот.
Вон здогаднул же початком рока Секретарият запровадзел конкурс наменєни набавки системи видео-надпатрунку, а тогорочни конкурси предлужованє и преширйованє тей програми, з ище свеоблапнєйшим приступом ґу унапредзованю безпечносци у школох.
«На основи искуствох з предходних рокох, програма далєй розвивана и преросла до конкурсох хтори облапяю нє лєм технїчну защиту, алє и злєпшованє самих условийох за роботу и пребуванє у школох. На таки способ ясно указуєме же безпечносц дзецох и занятих наш заєднїцки приоритет и же Покраїнска влада до того уклада систематично и длугорочно.» – заключел подпредсидатель Покраїнскей влади, покраїнски секретар Роберт Отот.
Покраїнска влада и Секретарият и убудуце буду укладац до защити и сиґурносци школских обєктох, бо то, як поручене на шветочносци, «нє трошок, алє инвестиция до стабилней и безпечней будучносци нашей заєднїци.»
