Ище 10 милиони динари за 80 проєкти хтори моцня мултикултуралносц и медзинационалне сотруднїцтво у Войводини
Подпредсидатель Покраїнскей влади и покраїнски секретар Роберт Отот шветочно уручел ришеня здруженьом хтори успишно конкуровали у другим циклусу Конкурсу Покраїнского секретарияту за образованє, предписаня, управу и национални меншини – национални заєднїци за софинансованє програмох и проєктох очуваня и пестованя мултикултуралносци и медзинационалней толеранциї на териториї АП Войводини.
По ребалансу буджету, за други циклус конкурсу видвоєни додатни 10 милиони динари, та вкупна сума средствох наменєних за тоту обласц у 2025. року досцигла 29 милиони динари, цо два раз вецей як предходного року. У двох циклусох конкурсу, того року вкупно потримани 314 проєкти.
«Войводина простор у хторим розличносц нє препреченє, алє богатство. То простор на хторим ше виками стретаю култури, язики, традициї и обичаї числених народох и националних заєднїцох и праве з того мозаику розличносцох черпаме моц нашого заєднїцкого идентитету.» – поручел Отот привитуюци присутних.
Потримани програми облапяю широки спектер активносцох – од очуваня язику, народних обичайох и старих занатох, прейґ защити и презентациї фолклорного нашлїдства, по уметнїцку, литературну и медийну творчосц хтора промовує толеранцию и почитованє медзи народами. Окреме препознати инициятиви хтори уключую младих, як ключних ношительох будучносци заєднїцкого животу у духу розуменя и почитованя.
«Горди зме же зме того року потримали вецей як 300 проєкти хтори повязую людзох и чуваю богатство розличносци. З тим указуєме же мултикултуралносц нє лєм наша традиция, алє и наш способ живота.» – визначел подпредсидатель Покраїнскей влади и покраїнски секретар Роберт Отот.
Вон подзековал представительом здруженьох на усиловносци и пошвеценосци у очуваню културней рижнородносци и визначел же Покраїнска влада и убудуце предлужи потримовац шицки програми хтори доприноша моцнєню духа заєднїцтва, толеранциї и сотруднїцтва медзи народами и националнима заєднїцами у Войводини.
