За инвестициї до обєктох образовно-воспитних установох у Войводини 100 милиони динари
Предсидателька Покраїнскей влади Мая Ґойкович придала нєшка контракти у суми 100 милиони динари за реконструкцию, адаптацию, санацию, инвестицийне и чечуце отримованє обєктох 20 установох основного образованя и воспитаня у АП Войводини за 2025. рок.
Предсидателька Ґойкович визначела же тота програма представя єдну зоз найзначнєйших формох заєднїцкого укладаня до будучносци – до школярох, наставнїкох и до самей заєднїци.
«Укладанє до обєктох и инфраструктури школох значи злєпшанє животу вкупней заєднїци. То нє лєм материялни средства – то вислов нашого стараня о дзецох, їх окруженя и квалитету настави», гварела предсидателька.
Ґойковичова наглашела же Покраїнска влада у сотруднїцтве зоз локалнима самоуправами роками уклада до образовней инфраструктури зоз цильом же би кажде дзецко у АП Войводини мало єднаки и добри условия за школованє.
«Пред трома мешацами на прешлим конкурсу видвоєли зме 375 милиони динари за установи основного и штреднього образованя и воспитаня, як и за установи школярского стандарду, цо значи же у 2025. року видвоєне 475 милиони динари за вкупно 84 установи. Наздавам ше же и идуцого року предлужиме зоз трендом звекшованя средствох за адаптацию и реконструкцию школох ширцом нашей покраїни», поручела предсидателька и з тей нагоди здогадла же, за тоту обласц, у периоду од 2020. по 2024. рок, зоз покраїнского буджету опредзелєне коло два милиярди динари за инвестициї хтори облапели окончованє роботох, виробок проєктно-технїчней документациї и опрему до нововибудованих обєктох.
Подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот гварел же нєшкайше придаванє контрактох представя предлужованє єдней добрей и обдуманей политики – политики хтора на образованє патри як на укладанє до фундаментох дружтва.
