Министер Бериша ше стретнул зоз подпредсидательом Покраїнскей влади и покраїнским секретаром за образованє, предписаня, управу и национални меншини – национални заєднїци Робертом Ототом
Министер за людски и меншински права и дружтвени диялоґ Демо Бериша, стретнул ше зоз подпредсидательом Покраїнскей влади Робертом Ототом, зоз хторим бешедовал о можлївосцох дальшого моцнєня сотруднїцтва з цильом додатного унапредзеня положеня припаднїкох меншинских заєднїцох и їх правох и шлєбодох.
На схадзки ше бешедовало и о образованю меншинох хторе важне за очуванє и розвой їх националного идентитету, а собешеднїки ше зложели же од значносци ученє сербского як нємацеринского язика дзвигнуц на ище висши уровень.
Тиж, було слова о позитивних прикладох у роботи Покраїнского секретарияту за образованє, предписаня, управу и национални меншини – национални заєднїци у вязи з додатним унапредзеньом положеня меншинских заєднїцох, цо насампредз потримане през континуоване звекшанє пенєжних даваньох, як и през рижни конкурси.
Собешеднїки бешедовали и о вименкох и дополнєньох Закона о националних совитох националних меншинох, на чим ше, як цо догваренє, будзе заєднїцки робиц з цильом пренаходзеня найлєпших ришеньох.
Визначене же за ришованє проблемох и спокусох барз важна директна комуникация з меншинскима заєднїцами, як приоритет у роботи ресорного министерства, а тото и потвердзене з нащивами националних совитох хтори министер Бериша, вєдно зоз своїма сотруднїками, реализовал од початку свойого мандату.
Жридло: Министерство за людски и меншински права и дружтвени диялоґ