Роберт Отот нащивел два школи з нагоди початку школского року
Нови школски 2025/2026. рок почал нєшка ширцом Войводини, а з тей нагоди, подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот нащивел два школи, у Суботици – Ґимназию за талантованих школярох «Деже Костоланї» и у Бачкей Тополї Основну школу «Чаки Лайош».
«Початок нового школского року вше окремна хвилька. Образованє представя континуитет хтори ше нє застановює, и на початку каждого школского року ше предлужує роботи хтори почати предходних рокох. Наш секретарият континуовано уклада до образованя, же бизме школяром и наставнїком обезпечели лєпши условия за роботу и ученє», визначел секретар Отот з нагоди нащиви школом.
З тей нагоди, Отот бешедовал зоз школярами и наставнїками, пожадал им успишни початок нового школского року и визначел задовольство же мал нагоду видзиц роботу, ентузиязем и креативносц школярох у обидвох школох. Вон насампредз наглашел же у Суботици, при Ґимназиї «Деже Костоланї», пошвидко будзе вибудовани модерни дом за школярох, цо представя значни крочай у потримовки талантованей младежи у Покраїни.
«Мили школяре, жадам вам успишни и виполнєни школски рок. Най кажди дзень будзе нагода за ученє, друженє и пренаходзенє нових стварох, а школа най вам будзе сиґурне место дзе будзеце мац чувство потримовки и сиґурносци.» – заключел Роберт Отот.
