За инвестициї до обєктох образовних установох у АП Войводини 375 милиони динари
Предсидателька Покраїнскей влади Мая Ґойкович уручела нєшка контракти у вредносци 375 милиони динари за финансованє и софинансованє инвестицийох до обєктох установох предшколского, основного, штреднього образованя и школярского стандарду на териториї AП Войводини у 2025. року.
Предсидателька Ґойкович визначела же нєшкайше додзельованє контрактох доказ же ше Покраїнска влада у своєй роботи намага укладац и твориц добри условия за школованє и роботу просвитних роботнїкох.
„Зоз реализацию тих проєктох ше облапи роботи на закрицох и фасадох, заменьованю дослужених облакох и дзверох, реконструкциї системох зогриваня и електроинсталацийох, ушореня школских дворох и спортских теренох, як и адаптациї обєктох пре їх лєпшу доступносц и безпечносц“, гварела Ґойковичова.
Предсидателька наведла же додзелєни 64 контракти за 37 установи основного образованя и воспитаня, 13 установи штреднього образованя, штири установи школярского стандарду и дзешец предшколски установи на териториї AП Войводини.
Ґойковичова визначела значну розлику у висини додзелєних средствох у одношеню на прешли рок.
„У 2024. року видвоєни 186 милиони динари за тоти наменки, так же з тоту розлику направени значни викрок и по укладаню и по числу установох хтори того року доставаю средства. Тото указує же вшелїяк єден зоз приоритетох роботи нашей Влади образованє“, поручела предсидателька Ґойкович и додала же од 2020. по 2024. рок Покраїнска влада уложела вецей як 1,8 милиярди динари до обласци образованя.
З тей нагоди вона наявела же ше пошвидко розпише нови конкурс за инвестициї до установох основного образованя, за хтори опредзелєни додатни 100 милиони динари.
На додзельованю бешедовал и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот хтори гварел же ше з видвоєнима средствами одвитує на потреби установох у городских алє и валалских штредкох и же, зоз потримовку предсидательки Ґойкович, ресорни секретарият ма додатну стимулацию витирвац при запровадзованю планованих проєктох и так обезпечиц каждей образовней установи у Войводини, без огляду на велькосц и положенє, достац шансу за розвой.
„Укладанє до образованя бул и остава єден з ключних приоритетох нашей покраїнскей администрациї. Прешвечени сом же и у наступним периодзе будземе вєдно робиц на твореню ище квалитетнєйших и функционалнєйших условийох за образованє у цалей Войводини“, поручел Отот.
Жридло: Покраїнска влада
