Почал Камп мултикултуралносци у Канїжи
Подпредсидатель Покраїнскей влади и покраїнски секретар Роберт Отот шветочно отворел «Камп мултикултурализма» у Канїжи. Камп часц ширшого проєкту Покраїнскей влади под назву «Афирмация мултикултурализма и толеранциї у Войводини», чий основни циль пестованє вредносцох културней рижнородносци и стимулованє медзинационалного сотруднїцтва и порозуменя медзи младима.
През два штиридньово термини, през друженє, тимску роботу и змаганя, вкупно 144 учашнїки зоз 16 войводянских школох буду мац нагоду витвориц нови познанства, прешириц видогляди и учиц єдни од других.
«Тот камп окремни прето же вон одражує дух Войводини – простор у хторим розлични народи, язики и култури нє лєм исную єдни при других, алє и жию вєдно, будую довириє и почитую розличносци. През розгварку, отвореносц и медзисобне слуханє, ви поставаце ношителє пременкох и будуєце єдно отворенше, толерантнєйше дружтво», визначел Отот з нагоди отвераня.
Камп ше реализує у орґанизациї Покраїнского секретарияту за образованє, предписаня, управу и национални меншини – национални заєднїци, у сотруднїцтве зоз Спортским здруженьом „Брос Джим” и зоз потримовку локалней самоуправи.
Попри спортско-рекреативних и едукативних активносцох, програма Кампу облапя и креативни роботнї и змисти хтори промовую мултикултуралносц, тимски дух и фер-плей. Як и прешли роки, найуспишнєйши учашнїки буду наградзени з едукативним путованьом у орґанизациї Покраїнского секретарияту, хторому циль устаємнїц вредносци проєкту и дац младим нагоду упознац културолоґийно блїзки простори и заєднїци.
За реализованє тогорочного кампу Секретарият обезпечел финансийну потримовку у суми 4 милиони динари.
На шветочним отвераню присуствовал и предсидатель општини Канїжи Роберт Фейстамер.