Медзинародни дзень людских правох – сообщенє
Медзинародни дзень людских правох ше у швеце означує 10. децембра – як здогадованє на датум кед 1948. року Ґенерална скупштина Зєдинєних нацийох прилапела Универзалну декларацию о людских правох. Декларация преглашує же ше шицки людзе народзую шлєбодни и єднаки у достоїнстве и правох хтори припадаю каждому, без огляду на расу, фарбу скори, пол, язик, виру, политичне або друге прешвеченє, националне або дружтвене походзенє, маєток або гоч хторе друге свойство.
Седемдзешат роки по прилапйованю Универзалней декларациї о людских правох, 2018. року, на инициятиву Покраїнскей влади, Скупштина АП Войводини установела 10. децембер як датум од покраїнскей значносци. Зоз тим поступком покраїна додатно наглашела значносц того дня з чиїм ше шветочним означованьом визначує вредносци етнїчно, язично, културално и конфесийно богатей Войводини, у хторей ше заєднїцтво будовало и вибудовало праве на розличносцох шицких заєднїцох хтори у нєй жию.
Почитованє людских правох потребне щициц и моцнїц у каждим моменту, на каждим месце, з каждей нагоди. У спокусних часох у яких жиєме, потребне заєднїцтво и дзека за дальше унапредзованє людских правох. Обовязка и одвичательносц шицких у покраїни и Републики Сербиї то предлужиц справовац ше и дїйствовац потримуюци єднакосц и достоїнство, же би ше шицким гражданом дало сиґурносц и защиту їх людских правох.
З таку одвичательносцу на розуме и прешвеченьом же дух заєднїцтва, розличносци, єднакосци будземе и надалєй пестовац и розвивац, винчуєме шицким Медзинародни дзень людских правох.