Сообщенє з нагоди парняцкого насилства у ОШ «Соня Маринкович» у Суботици
З нагоди ище єдней нєприємней подїї – акту парняцкого насилства, яке ше случело у ОШ «Соня Маринкович» у Суботици, дзе єдно дзецко достало чежки тїлесни покалїченя, виражуєме застараносц пре вше частейши случаї парняцкого насилства у образовно-воспитних установох.
По информацийох яки Покраїнски секретарият за образованє, предписаня, управу и национални меншини – национални заєднїци достал од просвитного инспектора городскей управи Городу Суботици, школя подняла шицки потребни мири яки предписани з Общим протоколом за защиту дзецох од злохаснованя и занєдзбованя и Окремним протоколом за защиту дзецох и школярох од насилства, злохаснованя и занєдзбованя у образовно-воспитних установох.
Попри тим, нєшка отримана и схадзка Активу директорох основних и штреднїх школох у Суботици, на хторей анализована ситуация у суботицких школох кед у питаню парняцке насилство. На схадзки заключене же у наступним периодзе нєопходне частейше указовац на можлїви причини и пошлїдки парняцкого насилства – як дзецом, так и родичом. Тиж, окреме важне цо вецей упознац и родичох зоз змистами яки ше характерує як диґиталне насилство, и яким числени дзеци виложени на дружтвених мрежох, а хтори часто причина нємилих подїйох.
На спомнутей схадзки, заменїк началнїка Полицийней управи у Суботици поволал школи на интензивнєйше сотруднїцтво хторе идзе шицким на хасен – дзецом, родичом, школом и институцийом. За конкретну подїю яка ше случела у ОШ «Соня Маринкович», заменїк началнїка гварел же шицки компетентни институциї упознати зоз подїю, и поступаю у складзе зоз своїма компетенциями.
Покраїнски секретарият за образованє, предписаня, управу и национални меншини – национални заєднїци з тей нагоди виражує жаль пре пошлїдки нємилей подїї и ище раз апелує на шицки образовно-воспитни институциї же би ше притримовали у цалосци одредбох протоколу о превенциї насилства, и же би потримали превентивни мири ресорних орґанох у вязи зоз превенцию парняцкого насилства.