90 милиони динари за роботу националних совитох у Войводини
Предсидатель Скупштини АП Войводини др Балинт Югас и подпредсидатель Покраїнскей влади и покраїнски секретар за образованє, предписаня, управу и национални меншини – национални заєднїци Роберт Отот уручели нєшка контракти о софинансованю активносцох националних совитох националних меншиних хтори маю реґистроване шедзиско на териториї АП Войводини.
Зоз покраїнского буджету за активносци и функционованє 17 националних совитох у 2026. року видвоєни вкупно 90 милиони динари.
Привитуюци присутних, предсидатель Югас визначел же рижнородносц народох, язикох и културох єдно зоз найвекших богатствох Войводини.
«Войводина простор на хторим ше история нїґда нє писала лєм на єдним язику. Рижнородносц наставала зоз стретнуцох народох, културох и традицийох и постала фундамент нашого заєднїцкого живота. Моц Войводини нїґда нє була у тим же зме шицки исти, алє у тим же знаме жиц вєдно», поручел вон и визначел же од 2015. року та по нєшка през покраїнски буджет за роботу националних совитох видвоєни вецей як 700 милиони динари.
«Смисел укладаня до роботи националних совитох нє у самих числох, алє у тим цо вони оможлївюю: же би исновали школи и програми на мацеринским язику, же би ше чувало културни институциї и традициї заєднїцох, же исную медиї на язикох националних меншинох и же язики хтори виками исную на тим просторе маю свою будучносц. Прето нєшкайше подписованє контрактох нє лєм административна дїя, алє є и потвердзенє ясней политики же розлични идентитети богатство нашей покраїни», наглашел Югас.
Покраїнски секретар Роберт Отот визначел же подписованє тих контрактох представя предлужованє дошлїдней политики Покраїнскей влади унапряменей на очуванє правох националних заєднїцох, пестованє їх идентитету и моцнєнє мултикултуралносци у Войводини.
«Национални совити маю ключну улогу у очуваню язику, култури и традициї своїх заєднїцох, як и у розвою образованя и информованя на мацеринским язику. Барз важне же би национални совити мали стабилни условия за роботу и ясну институционалну потримовку, бо моцни заєднїци доприноша стабилносци, розвою и медзисобному довирую у нашим дружтве», поручел Отот.
Контракти подписани за софинансованє стаємних трошкох и рядовей дїлносци националних совитох, односно за програми и активносци у обласцох образованя, култури, информованя и службеного хаснованя язикох и писмох, як и за роботу установох и орґанизацийох хторим снователє национални совити, а средства ше додзелює у складзе зоз утвердзенима критериюмами.
Жридло: Скупштина Автономней покраїни Войводини
